Para pak minutash, në media u shpërnda lajmi se Florenc Beqiraj, i riu që ndodhet në koma në Francë, kishte ndërruar jetë.
Por, duket se ky është një lajm i rremë, teksa është motra e Florencit ajo që ka reaguar.
Në një postim në Facebook, motra e Florencit shkruan se ky është një lajm i rremë, ndërsa lutet që të mos thuhen më gënjeshtra.
“Nuk e di kush i nxjerr këto lajme të rremë që Florenci ka ndërruar jetë. Ju lutemi në emër të familjes tonë mos thoni gënjeshtra. As babai nuk e ka deklaruar diçka të tillë. Ne kemi shpresa që Florenci do të jetë sërish pranë nesh dhe ne jemi në kontakt me ambasadën”, shkruan motra e 23-vjeçarit nga Shkodra.
Vetëm një ditë më parë, i ati mbërriti në shtetin francez, për të qëndruar pranë të birit, i cili mbahej në jetë vetëm nga aparaturat. 23-vjeçari ishte në Francë prej dy vitesh, ku po përpiqej të përfitonte azilin. Shqiptari ra në brug, pasi u ndalua nga policia, e cila e arrestoi për mungesë dokumentacioni. Gjatë qëndrimit prapa hekurave ka ndodhur dhe incidenti që çoi në koma 23-vjeçarin.
Florenci u gjet i masakruar, me njolla në trup dhe një shenjë teli në fyt. Familja ka hedhur poshtë të gjitha thashethemet se ai mund të ketë tentuar vetëvrasjen. Të afërm të tjerë mendojnë se Florenci është masakruar në burg, nga policia, ose nga të dënuarit e tjerë.
Motra e Florencit që jeton prej disa vitesh në Mal të Zi, tha se i vëllai e ka marrë në telefon për t’i thënë se është ndaluar për shkak të mungesës së dokumentave dhe se në burg rrethohej nga njerëz të rrezikshëm.
Sipas saj, askush nuk i ka dhënë sqarime për ngjarjen, ndërsa zyrtarisht nga ambasada shqiptare i është thënë se i riu është vetëvarur me litar.
Familjarët e Florencit në Shkodër, pjesë e komunitetit egjiptian para pak ditësh bënë apel për ndihmë. Mes dhimbjesh e lotësh, ata u shprehën se Florenci ishte nisur drejt Francës me borxhe, në kërkim të një jete më të mirë.
Po ashtu, familjarët e 23-vjeçarit thanë se Ambasada Shqiptare në Francë nuk ka reaguar për ngjarjen dhe se ata ndihen të diskriminuar dhe të pashpresë.
Familja e të riut kërkoi para pak ditësh që shteti t’i ndihmonte dhe Florenci të kurohej dhe nëse nuk ia dilte në luftën me vdekjen, të bëhej i mundur transportimi i trupit të tij drejt Shqipërisë.
