Një ushtar ukrainas ka hedhur veten në erë tek një urë, për të bllokuar avancimin e rusëve. Ushtari ukrainas, Vitaliy Skakun ka hedhur veten në erë tek një urë në Henichesk, për të ndaluar përparimin e një kolone tankesh.
Lajmin e ka përcjellë Shtabi i Përgjithshëm i Forcave të Armatosura të Ukrainës, në Facebook.
“Në këtë ditë të vështirë për vendin tonë, kur populli ukrainas po zmbraps pushtuesit rusë në të gjitha drejtimet, një nga vendet më të vështira në hartën e Ukrainës ishte Isthmusi i Perekopit, ku një batalion i veçantë marinsash ishte një nga të parët që takoi armikun”, thuhet në deklaratë.
Vitaliy Skakun, inxhinier i batalionit të veçantë kishte dalë vullnetar për të kryer këtë detyrë. Ai nuk kishte patur kohë që të largohej.
Sipas shokëve të tij, Vitaliy ra në kontakt dhe tha se po hidhte në erë urën.
Menjëherë është dëgjuar një shpërthim.
“Shoku ynë vdiq. Vepra e tij heroike ngadalësoi ndjeshëm përparimin e armikut, gjë që i lejoi njësisë të ridislokohej dhe të organizonte mbrojtjen”, thuhet në deklaratë.
