Pas prezantimit të platformës për ringritjen e PD-së, një nga kritikët e Bashës, Ridvan Bode ka bërë të ditur se një grup drejtuesish të PD i janë drejtuar anëtarësisë për një proces që synon unifikimin e partisë dhe një proces zgjedhor të përgjithshëm.
Bode tha se bashkimi i PD përmes një procesi zgjedhor është qëllimi i tyre, ndërsa zgjedhjet për kreun e PD-së i cilësoi si të panegociueshme.
Demokrati tha se ata nuk janë një organizim juridik, po një lëvizje brenda PD-së:
“Të kërkohet ndjesë publike, të mundësohet hapja e një debati për kapërcimin e problemit që ka lidershipi, i cili vuan nga mungesa e kredibilitetit.
Do i drejtohemi edhe zyrtarisht partisë, por tashmë kërkesa është publike. Do takojmë demokratët anembanë Shqipërisë. Do jetë një platformë që do ta diskutojmë me gjithë anëtarësinë.
Qëllimi i lëvizjes nuk është të gjejë konsensus mes nesh e drejtuesve aktualë, qëllimi është më i gjëra, është bashkimi përmes një analize të thellë dhe më pas të shkohet në zgjedhje në të gjithë nivelet përmes devizës së bashkimit.
Ne nuk kërkojmë ndarje postesh, por pajtim përmes një debati të përgjithshëm, analizës dhe zgjedhjeve.
Rizgjedhja e kryetarit është një kusht i panegociueshëm. Kjo i bën mirë edhe kryetarit për kredibilitetin e tij të bjerrur. Ne nuk po kërkojmë fraksione dhe as përfaqësim të cilësuar. Duam votime dhe të drejta të barabarta në votime. Le të jetë anëtarësia që do të vendosë”.
