Konfirmimet e fundit që ai nuk është më pjesë e madrilenëve janë shumë të besueshme, pasi ai që ka folur është një gazetar dhe mik i ngushtë i Cristiano Ronaldos. Bëhet fjalë për Edu Aguirre, gazetar i “El Chiringuito de Jugones”, i cili ka folur për të ardhmen e portugezit 33-vjeçar tashmë nuk lidhet me Realin. Sipas tij, mbetet vetëm të arrihet marrëveshja mes Juventusit dhe klubit spanjoll, që tani kërkon më shumë se 100 milionë euro.
Ronaldo që nga viti 2009 deri sot ka fituar çdo trofe të mundshëm dhe është kthyer në një legjendë, por sipas asaj që thotë gazetari ka qenë një plan nga drejtuesit madrilen për ta larguar 5 herë fituesin e “Topit të Artë”. Florentino Perez insiston të përfitojë së paku 150 milionë nga shitja e njeriut që për nëntë vite në “Santiago Bernabeu”, fitoi katër trofe të Champions League dhe katër çmimi “Topi i Artë”.
“Cristiano po shkon, është jashtë Madridit, po largohet, kaq. Kam fol me të edhe ai e di se tashmë s’ka kthim prapa, është jashtë Madridit. Më dhemb shumë… më shumë më dhemb qe pas pak kohe njerëzit do të mendojnë se ai dëshiroi me të vërtetë të largohet dhe se për të ka përfunduar një epokë dhe se dëshiron të ndryshojë diçka”, u shpreh Aguirre.
“Por, nuk është kështu, Cristiano ndien se strategjia e klubit për ta larguar funksionoi, tashmë u realizua. Shumë do të thonë se është çmenduri se duhet te qëndrojë e mos ta bëjë këtë, jo për para e gjëra tjera. Mos harroni se edhe Cristiano mendon “pse më duhet te ndërrojë ambient, këtu kam familjen të lumtur, klubin që dua, më pëlqen Madridi. Ai e di se në Juve nuk do ta ketë si në Madrid. Por, vendimet përfundimtare varen në atë që ndien.”
