Sjellja e Paul Pogba është kthyer në një çështje tek Manchester United. Në merkaton e verës ai kërkoi largimin nga “Djajtë e Kuq” në drejtim të Barcelonës dhe kjo i ka thyer raportet mes tij dhe trajnerit portugez, Jose Mourinhon. Kampionit të botës iu la shiriti i kapitenit për të përmirësuar raportet, por deklarata e bërë pak ditë më parë i ka dhënë fund këtij bashkëpunimi.
Për këtë situatë të krijuar tek Manchester United ka folur edhe ish-lojtari i “Djajve të kuq”, Paul Ince. Ai ka treguar se si do të zgjidhej kjo situatë në kohën kur trajner ishte Sir Alex Ferguson.
“Nëse kjo do të ndodhte në drejtimin e Sir Alex, ai do të kishte thënë një gjë: ‘Ai do të largohet. Largojeni nga këtu tani’. Kjo pasi ai nuk do të lejonte që ekipi te prishej për shkak të sjelljes së Paul Pogbas. Unë mendoj se fati i tij tashmë është mbyllur plotësisht dhe ai do të largohet në janar. Flasim për Mourinhon që do të shkojë para tij, por do të isha i hutuar nëse Ed Woodward e lejoi këtë gjë të ndodh”, tha Ince.
