Në fitoren e kombëtares “Shpresa” përballë Bjellorusisë protagonistë absolutë ishin dy lojtarë të rinj të cilët luanin ndeshjen debutuese. Emir Sahiti dhe Shefit Shefiti realizuan golat në këtë sfidë mjaft delikate, e cila vinte pas disa rezultateve negative. Shefiti është një sulmues mjaft premtues i cili luan për Shkëndijën e Tetovës, ndërsa Sahiti luan për Hajduk Split dhe shumë shpejt pret debutimin në ekipin e parë.
“Jam shumë i gëzuar për dy golat e shënuar, shumë i lumtur me paraqitjen time. Besoj që në ndeshjet e ardhshme do të realizoj edhe më tepër gola. Pjesa më e madhe e lojtarëve ishin të datëlindjes 98-99 dhe besoj që do bëjmë një ekip shumë të mirë. Janë shumë lojtarë që luajnë në ekipe të mëdha europiane dhe besoj që do e shohim shumë lart Kombëtaren Shpresa”, deklaroi Sahiti.
Një tjetër lojtar të cilin trajneri Bushi e vlerëson si lojtar mjaft të rëndësishëm për të ardhmen, është edhe Shefit Shefiti, talenti i Shkëndijës së Tetovës, që realizoi golin e parë të kuqezinjve.
“Si fillim e rëndësishme është fitorja. Jam shumë krenar që përfaqësoj kombin shqiptar. Jam i lumtur që debutova me gol”, tha Shefiti.
Promovimi në përfaqësuesen e 21-vjeçarëve ishte vetëm hapi i radhës, me dy talentet Sahiti dhe Shefiti që tashmë synojnë të bëjnë gjëra të rëndësishme edhe në klubet e tyre.
“Besoj që shumë shpejt do të bashkohem me ekipin e parë të Hajdukut të Splitit. Kjo do të ndodhë shumë shpejt”, thotë Sahiti.
“Ne gjithmonë stërvitemi për të dhënë maksimumin në ndeshje, si me klubin ashtu edhe me kombëtaren. Përfaqësuesja normalisht që të dhuron më tepër emocione, por edhe te Shkëndija jam shumë i lumtur me aktivizimin dhe me ndihmën e lojtarëve të tjerë”, shprehet Shefiti.
