Është mbyllur në barazim sfida e fundit e fazës së parë që u zhvillua në Vlorë mes Flamurtarit dhe Kukësit. Ndeshja është zhvilluar pa tifozë pas vendimit të Komisionit të Disiplinës, por këtë herë ka pasur polemika të mëdha në fushë për golin e anuluar në fundin e takimit për Flamurtarin. Ndeshja përfundoi me rezultatin 1-1 dhe kjo bëri që Skënderbeu të vijë në fazën e dytë më komod dhe me një diferencë të madhe pikësh me vendin e dytë.
Kampionët në fuqi të Superiores u shfaqen cinikë, sidomos në pjesën e parë, kur Bakaj në të 37-ën ekzekutoi saktësisht një goditje dënimi. Por vetëm kaq, sepse Flamurtari hyri në fushë me një tjetër motivim në pjesën e dytë, derisa gjeti golin e barazimit me Bushic në minutën e 73-të, pas krosimit të Zhufos.
Momenti më i diskutueshëm i sfidës ishte ai i kohës shtesë, kur Zhufo realizoi direkt nga goditja e lirë, por për anësorin ishte pozicion jashtë loje i Mustës, që duket qartë që merr pjesë në aksion, por nuk e prek topin. Ky rezultat i shkon përshtat Skënderbeut, që e sheh rivalin më të afërt, Kukësin, me tetë pikë më pak në tabelën e renditjes në përfundim të fazës së parë.
FLAMURTARI – KUKËSI 1-1
Bushiç 73′ / Bakaj 37′
Flamurtari: Nurkoviç, Siljanovski, Bicaj, Jakovljeviç, Mersini (Zhufo 46′), Musta, Useini, Pollozhani, Hoxhaj (Kamara 65′), Alvesh (Hyseni 85′), Bushiç
Trajner: Shpëtim Duro
Kukësi: Koliçi, Idrizi, Hoxha, Alla, Rrumbullaku, Et’hemi (Zeqiri 72′), Imami (Musolli 54′), Krkotiç, Kale (Alijev 83′), Bakaj, Guri
Trajner: Mlladen Milinkoviç
Gjyqtar: Eldorian Hamiti
