Rusia nuk e ka njohur akoma pavarësinë e Kosovës dhe këtë e ka treguar edhe në Kupën e Botës. Pavarësisht se shteti më i ri në Ballkan ka Federatë futbolli dhe është pranuar në familjen e FIFA-s, duke u mirëpritur në grupin e më shumë se 200 federatave nacionale, në Rusi nuk ka vend për flamurin e tyre.
Flamuri i Kosovës është i përfshirë në një dokument prej shtatë faqesh, ku bëjnë pjesë flamuri i Tajvanit, Iranit pararevolucionar, po ashtu edhe disa flamuj të lëvizjeve separatiste. Flamujt e grupeve terroriste po ashtu janë ndaluar, si ai i Shtetit Islamik (ISIS).
FIFA ka refuzuar që të dalë në një qëndrim për këtë çështje, duke ia lënë përgjegjësinë komisionit organizator rus, ndërsa këta të fundit kanë refuzuar të japin sqarime, shkruan New York Times.
Edhe pse skuadra e Kosovës nuk është në Rusi, vendi i tyre përsëri bëri buje në Kampionatin Botëror, pasi mesfushori i Zvicrës, Xherdan Shaqiri në takat që zbriti në fushë mbante flamurin e Kosovës. Shaqiri ka lindur në Kosovë, por prindërit e tij kanë emigruar në Zvicër para se të fillonte lufta në Kosovë.
