Franca u shpall kampione bote në Botërorin e Rusisë për herë të dytë në historinë e saj. Paul Pogba ka treguar se është një lider i vërtetë në skuadër, pasi ka mbajtur në dhomat e zhveshjes disa fjalime që padyshim u ka dhënë zemër shokëve të skuadrës. Në preag të ndeshjes me Argjentinën, që Franca e mposhti 4-3, Pogba u drejtohet shokëve me fjalët:
“Unë dua të shoh luftëtarë në fushë, nuk dua të kthehem në shtëpi! Do ta mbarojmë të lumtur këtë Botëror, dua të luaj sonte, të vdes në fushë. Të gjithë së bashku, dua njerëz, luftëtarë, ushtarë. Sot, ne do t’i vrasim ata. Messi apo jo Messi, nuk më intereson! Ne kemi ardhur për ta fituar këtë Kupë Bote!” tha Pogba për shokët e tij, në një skenë të dokumentarit të transmetuar nga TF1.
Mesfushori i Manchester United, Paul Pogba, ishte po i tillë frymëzues me fjalimin e tij, para se Franca të mundte Uruguajin 2-0 në Nizhny Novgorod, për një vend në gjysmëfinale të Kupës së Botës. “Kjo është ajo që duhet të bëjmë, nuk ka kthim më, – tha Pogba. – Do të vazhdojmë përpara, do të shkojmë gjithë rrugës!
Të shohim më 15 korrik, të gjithë së bashku! Sot, Blaise Matuidi, i cili u pezullua për përplasjen e çerekfinales, si rezultat i akumulimit të kartonëve të verdhë, është në stol. Ai është i zhgënjyer, është i mërzitur, dëshiron të luajë më shumë se kushdo tjetër në fushë!
Ky është një sinjal për djemtë, që të luftojnë fort sot! Ai nuk do të jetë në fushë, por do të jetë sikur të ishte me ne. Të gjithë duhet të bëjnë lojën e tyre, edhe për Matuidi! Dhe tani, ne do të luftojmë për partnerët tanë, siç kemi bërë edhe më parë. Të luajmë si ndaj Argjentinës dhe ndoshta më shumë, gjithnjë e më mirë. Duhet të mundim më të mirët për të qenë më të mirët!”
