Ministri në detyrë, Ditmir Bushati, ka thënë fjalët e fundit si ministër i Jashtëm. Përpara gazetarëve, ai apeloi për të ezauruar një orë e më parë procedurën kushtetuese, për të dekretuar ministrin e Jashtëm, post që e mori vetë kryeministri Rama. Ai deklaroi se pozicioni i ministrit ka dy dimensione, kushtetues dhe politik.
Bushati shtoi më tej se është e drejtë dhe përgjegjësi e kryeministrit për të përzgjedhur ekipin e tij, që ai do të përmbushë objektivat e programit në këtë fushë.
“E kam konsideruar që ditën e parë të punës time në këtë institucion nder dhe privilegj për të përfaqësuar vendin tim në arenën ndërkombëtare. Për këtë falënderoj kryeministrin Rama, dhe partinë time.
Falenderoj ekipin e shërbimit të Jashtëm, qoftë stafin diplomatik, që nga mesi i shtatorit deri në këto orët e mia të fundit në Ministrinë për Evropën dhe Punët e Jashtme që më kanë mbështetur për realizimin e disa objektivave.
Pozicioni i ministrit ka dy dimensione, kushtetues dhe politik. Sa i përket dimensionit politik, kryeministri e ka marrë vendimin e tij, për të ndryshuar drejtimin e politikës të ministrisë. Është e drejtë dhe përgjegjësi e kryeministrit për të përzgjedhur ekipin e tij, që ai do të përmbushë objektivat e programit në këtë fushë.
Apeli im është i thjeshtë, për të ezauruar një orë e më parë procedurën kushtetuese që jetëson jo vetëm ndryshimin e lidershpit politik në ministrinë e Jashtme, por do ti krijonte mundësi vendit për tu përfaqësuar në mënyrë të denjë në arenën ndërkombëtare, pasi vendi është përballë sfidave që vendi nuk i ka njohur më parë”.
