Fjalë prekëse/ Djali e vajza nxjerrin jashtë shtëpisë të moshuarit, “Fundjava Ndryshe” u vjen në ndihmë

Një çift të moshuarish enden rrugëve, pasi djali dhe vajza i kanë nxjerrë jashtë. Të rrënuar shpirtërisht dhe ekonomikisht, ata kërkojnë ndihmë për strehim. Një natë ata kishin lypur disa lekë, për të siguruar një natë në hotel, e ndërsa sot kanë mbetur në qiell të hapur. I moshuari nuk hedh poshtë fëmijët, e ndërsa fillon të qajë, shtrin dorën për ndihmë.

Ky është fati tragjik i një çifti të moshuarish nga Korça, të cilët janë vënë në kërkim të një vendi ku mund të qëndrojnë, pa shqetësuar aspak fëmijët e tyre të cilët i nxorën jashtë. Fëmijët i kanë përzënë, bashkia ua ka mbyllur derën, policia nuk ua ka zgjidhur problemin me fëmijët, të cilët i kanë nxjerrë jashtë.

Të pyetur nga qytetari që ka filmuar videon, se kush i nxori jashtë dhe ku po shkojnë, i moshuari shprehet:

“Në fillim djali, pastaj çupa. Po ja të shohim për ndonjë pemë, rrimë poshtë saj, pse ku të vemi”.

E moshuara e cila është me paterica mbahet nga fuqia e burrit, e kur për fat të keq, edhe atë e kanë lënë fuqitë. Ndonëse kanë apeluar për ndihmë, policia nuk ka bërë asgjë në këtë drejtim. “Kemi dy ditë që endemi rrugëve, dhe as policia nuk na bën derman, i kam njoftuar, por asgjë”.

Qytetari: Po me se ushqehesh?

I moshuari: Me lekët e pensionit.

Qytetari: Po pse nuk shkoni në shtëpi?

I moshuari: Po s’kemi shtëpi fare, na kanë nxjerrë edhe djali edhe çupa, të dy. Bashkia na tha se do na strehonte sot, por hiç asgjë.

Qytetari: Po dje ku fjetët?

I moshuari: Atje në hotel. Na dhanë nga 4-5 veta nga 1 mijë lekë, 2 mijë lekë dhe bëmë 10 mijë lekë. Por sonte jemi në krizë fare.

Qytetari: Po sot?

I moshuari nis të qajë dhe nuk përmban dot lotët, dhe e shoqja i thotë “Mjaft qave!”. Ndonëse azili u ka premtuar se nuk do i lërë jashtë, premtimi ende nuk është mbajtur.

Por drejtori i Fondacionit “Fundjava Ndryshe”, Arbër Hajdari, pas sinjalizimit të këtij rasti, është vënë menjëherë në lëvizje.

Ai citon përmes një postimi në Facebook se çifti i të moshuarve nuk do të endet më rrugëve, pasi do të ketë një shtëpi të ngrohtë për ta, ku të qëndrojnë. Duket se apeli nuk ka shkuar në vesh të shurdhër, duke u dhënë mundësi të moshuarve të jetojnë në paqe, ndonëse fëmijët i lanë në harresë.