Një nga emrat më të njohur të artit dhe muzikës në Shqipëri, maestro Zhani Ciko i është përgjigjur akuzave mbi fituesin e ‘paracaktuar’ të edicionit të 58-të festivalit në RTSH.
I ftuar në emisionin ‘Java’ në Radio Televizionin Shqiptar, Ciko i cili këtë vit është pjesë e jurisë që do të vendosë për këngën që do të përfaqësojë Shqipërinë në Eurovision, sqaroi se vendimet e jurisë janë të pakontestueshme.
Reagimi i tij pason pas akuzave të kompozitores Diana Ziu, e cila sulmoi atë dhe Vera Grabockën. Ajo i akuzoi të dy këta dy personazhe, se kanë qenë të besuarit e partisë, pa asnjë meritë në kohën e diktaturës.
“Vendimet e jurisë janë të pakontestueshme, ky është pakti numër një. Ti shkon, paraqet krijimin tënd te një juri që e ka përcaktuar dikush tjetër. Kjo juri do japë vendimin e saj, siç e gjykon ajo. Unë sa kam ardhur në festivalin e parë në vitet ’90, kam iniciuar post-festivalin. Ajo ishte demokraci, që njerëzit të thonin mendimet e tyre për këngët.
Ky festival ka nisur jo me post-festival, por me anti-festival. Të thuash që duhet të anulohet festivali, se s’ka fituar një këngë [apo një tjetër], është absurditet. Çfarë interesi kisha unë që të mos fus këngën e një kolegeje? Ka pasur dhe shumë kolegë të tjerë të mitë, për të cilët ngela shumë keq, por nuk u futën”.
Netët e festivalit do të mbahen në datat 19, 20 dhe 22 dhjetor, në Pallatin e Kongeseve, nën drejtimin e Alketa Vejsiut.
