Gjykata e Lartë indiane ka marrë një vendim historik, që shënon fitore për të gjitha shtetaset e këtij shteti.
Bëhet fjalë për praktikën e divorcit të menjëhershëm në Islam të njohur si “talaq”, e cila u ndalua nga Gjykata e Lartë , që e shpalli atë jokushtetuese.
Deri më tani, një burrë në Indi mund të divorcohej nga gruaja e tij brenda pak minutash, duke thënë tre herë fjalën “talaq”.
Por, kjo nuk do të jetë më e mundur pas vendimit të gjykatës, gjë që është pritur me shumë entuziazëm nga aktivistët për të drejtat e grave dhe shënon një hap të rëndësishëm drejt barazisë mes burrave e grave indiane.
Vendimi erdhi pas shqyrtimit të 5 rasteve të grave muslimane të divorcuara në këtë mënyrë dhe peticionet nga dy grupe të të drejtave.
Divorci me anë të talaq-ut të trefishtë nuk është i përmendur në ligjin Sharia ose në Kuran, edhe pse praktika ka ekzistuar për dekada të tëra.
