Në Itali pati një shpërthim masiv të koronavirusit, teksa infektimit nuk i shpëtuan edhe një numër i madh futbollistësh në Serie A. Mes tyre edhe Patrick Cutrone, ish-sulmues i Milanit që tashmë aktivizohet me Fiorentinën.
Italiani i vjollcëve fatmirësisht tashmë e ka hedhur pas krahëve sëmundjen ndërsa tregon se ka pasur shumë frikë duke qenë se ishte një virus i panjohur. Ndër të tjera, Cutrone shprehet se golin e parë pas kësaj situate të vështirë do ia dedikoj heronjve të vërtetë, mjekëve.
“Për fat të mirë dhe këtë eksperiencë të hidhur e kam hedhur pas krahëve. Kam pasur frikë pasi është një virus i panjohur që askush nuk e njeh. Isha i shqetësuar për veten time dhe personave që kisha pranë.
Por, lirimi i vërtetë erdhi në momentin kur testi doli negativ, vetëm atëherë e hoqa peshën nga supet”. Dedikimi i golit pas kësaj situate? “Do të jetë një ndjenjë çlirimi dhe do ia dedikoj të gjithë atyre që po luftojnë në këtë situatë të vështirë; mjekë, infermierë, vullnetarë. Janë heronjtë e këtyre ditëve”, u shpreh Cutrone.
