Sulmuesi i Kamzës, Sebino Plaku do të marrë qindra mijëra euro nga ish-ekipi i tij në Poloni. Plaku fitoi gjyqin ndaj ish-ekipit Slask, duke fituar plot 300 mijë euro.
Ekipi i Slaskut dhe Federata e Futbollit të Polonisë janë të detyruara që brenda 30 ditëve t’i paguajnë këtë shumë sulmuesit.
Lajmi u konfirmua nga mediat polake, që e kanë ndjekur këtë çështje që nga sezoni 2014-2015. Mësohet se Plaku ka bërë një tolerim, duke lejuar që shuma të paguhet me dy këste.
Sulmuesi firmosi kontratë me rreth 10 mijë euro në muaj në vitin 2013 dhe për një sezon u pagua rregullisht. Por, në startin e sezonit pasardhës drejtuesit e klubit i kërkuan t’i përgjysmonin rrogën, gjë që nuk u pranua nga sulmuesi.
Plaku kërkoi prishjen e kontratës, gjë që ndodhi, por edhe vendosi ta ndiqte çështjen juridikisht.
Çështja u gjykua nga komisionet disiplinore në Poloni, që e çliruan futbollistin nga çdo detyrim kontraktual, por pa i dhënë të drejtë për rrogat e prapambetura. Sulmuesi e çoi çështjen në KAS, duke përfituar rreth 250 mijë euro rrogë të dy sezoneve, plus kamatëvonesat.
