Ministria e Brendshme do të ofrojë shërbime policore kundrejt një pagese për subjektet private dhe publike.
Kryeministri Rama ka firmosur sot vendimin për krijimin e shoqërisë “Illyrian Guard”, e cila do të jetë me kapital 100% shtetëror.
“Shoqëria “Illyrian Guard”, sh.a., ofron shërbime me pagesë, kundrejt subjekteve të treta, publike apo private, në fushën e rendit e të sigurisë publike, teknologjisë së informacionit, si dhe çdo shërbim tjetër në përputhje me qëllimin e krijimit dhe statutin e saj“, thuhet në VKM.
Autoriteti publik që do të administrojë këtë shoqëri, e cila së shpejti pritet të regjistrohet në QKB me kapitalin fillestar 10 milionë lekë, sipas VKM-së është Ministria e Brendshme.
Ndërkohë, të gjitha institucionet dhe subjektet publike, të cilat kanë në administrim objekte shtetërore, i drejtohen me kërkesë kësaj shoqërie, për të përfituar shërbimin e ruajtjes dhe të sigurisë fizike.
“Nëse kjo shoqëri merr vendim për pamundësinë e ofrimit të shërbimit të kërkuar, institucionet dhe subjektet publike mund ta sigurojnë këtë shërbim në përputhje me legjislacionin përkatës në fuqi”, thuhet në vendim.
