Në Ministrinë e Financave janë firmosur sot tri marrëveshje. Një nga më të rëndësishmet është marrëveshja prej 80 milionë euro për rinovimin e konvikteve në kampusin universitar të Tiranës.
Të pranishëm kanë qenë Ministri i Financave dhe Ekonomisë, Arben Ahmetaj dhe ai i Energjetikës, Damian Gjiknuri.
Në fjalën e tij, ministri Ahmetaj falënderoi shtetin gjerman për mbështetjen që i kanë dhënë vendit tonë në modernizmin e shumë sektorëve.
“Një nga marrëveshjet që firmoset në favor të përmirësimit të kushteve për studentët në universitete, investim 80 mln euro që Shqipëria do bëjë me ndihmën e qeverisë gjermane për kampuset universitare. Është premtim që Rama e ka dhënë dhe do e mbajë brenda përfundimit të mandatit të dytë për rikonstruktimin e qytetit Studenti,” tha Ahmetaj.
Ndërkohë ministri i Energjitikës, Damian Gjiknuri u shpreh: “Tek sektori i energjisë do kemi sistemin dispeçeria me gjithë teknologjinë e duhur, do të jetë truri në energjinë elektrike, që do të përdoret për efiçencë më të mirë, më pak harxhime”.
Tre marrëveshjet
1-Memorandumi i mirëkuptimit për bashkëpunimin financiar mes Shqipërisë, Gjermanisë dhe Francës në lidhje me programin “Mbështetja e reformës në sektorin energjetik në Shqipëri”
2-Marrëveshja ndërmjet Qeverisë së Republikës Federale të Gjermanisë dhe Këshillit të Ministrave të Republikës së Shqipërisë për bashkëpunimin financiar 2016 për projektin “Programi i investimeve për shpërndarjen e energjisë elektrike I”.
3-Marrëveshja ndërmjet qeverisë së Republikës Federale të Gjermanisë dhe Këshillit të Ministrave të Republikës së Shqipërisë për bashkëpunim financiar 2017 për projektin “Programi për rinovimin e konvikteve në kampusin universitar të Tiranës sipas parimit të efiçiencës energjitike, faza III”.
