Finale e parakohshme, Juventus-Tottenham masin forcat në “Allianz Stadium”

Juventus dhe Tottenham supersfida e Champions League, të cilat të martën në mbrëmje do të masin forcat në “Allianz Stadium”. Dy ekipe të etura për sukses në Europë, pasi kanë kaluar shumë vite kur kanë ngritur në qiell një trofe të tillë.

Anglezët mbajnë mend suksesin e fundit në 1984-ën e largët, ku fitonin ish-Kupën Uefa. Nga ana tjetër edhe Juventus, kërkon suksesin pas më shumë se 20 vitesh, duke pasur parasysh edhe finalet e shumta të humbura. Tottenham vjen në këtë përballje pasi shkëlqeu në fazën e grupeve, duke lënë në vendin e dytë Realin e Madridit. Nga ana tjetër italianët nuk kanë bindur në ndeshjet e fazës së grupeve, duke e mbyllur të dytët në Grupin D, pas Barcelonës.

Përballjet e Juventusit me ekipet angleze janë pothuajse të balancuar, ku zonja e vjetër ka marrë18 fitore, 13 barazime dhe 15 humbje. Ndërkohë ecuria e Tottenham kundër skuadrave italiane është e respektueshme, por jo e mirë. Ata kanë humbur vetëm 3 nga 15 ndeshjet e luajtura kundër ekipeve italiane.

Për sa i takon statistikave, Juventus është e pamposhtur në 19 nga 21 ndeshjet e fundit që ka luajtur në Champions, ndërsa Tottenham ka fituar 6 nga 7 ndeshjet e fundit të këtij kompeticioni. Në 7 nga 8 takimet e fundit që Tottenham ka luajtur në Champions League, janë realizuar mbi 2.5 gola për ndeshje, ndërsa janë realizuar më pak se 2.5 gola për ndeshje në 3 takimet e fundit të Juventus në Champions League. Më të rrezikshmit në këtë sfidë do të jenë Gonzalo Higuain dhe Harry Kane, dy pikat kyçe të ekipeve që do të mundohen të bllokohen nga kundërshtarët. Kane është edhe golashënuesi i dytë në Champions këtë sezon, me 6 të tillë.

Speciale kjo sfidë do të jetë për spanjollin që ishte pjesë e Juventusit dhe ka dhuruar shumë emocione.  Fernando Llorente u largua nga “zonja e vjetër”, për tu transferuar në Angli por që gjithmonë e ka kujtuar me shumë dashuri eksperiencën e tij në Torino. Ai ka shprehur dëshirën për të pasur disa minuta që të përballet me ish-ekipin e tij. “Juventus është një klub i veçantë sepse është si një familje e madhe”, ka thënë spanjolli.