Procesi i Vettingut më në fund ka nisur zyrtarisht për 775 gjyqtarë dhe prokurorë. Ka filluar puna për kontrollin e pasurive të punonjësve të institucioneve të drejtësisë, të cilët do të verifikohen nëse kanë bërë deklarime të sakta të pronave të regjistruara dhe parave që kanë në bankë, nga Institucionet e administratës shtetërore.
Inspektorati i Lartë i Deklarimit dhe Kontrollit të Pasurive ka çuar në zyrën qendrore të hipotekave dy kopje të shkresave kondenciale, ku kërkon verifikimin për dy kategori: 13 anëtarët e Këshillin e Lartë të Prokurorëve dhe Këshillit të Lartë të Gjyqtarëve si dhe 775 gjyqtarët e prokurorët të punësuar në të gjitha hallkat e sistemit të drejtësisë.
ILDKPI kërkon që të nisë menjëherë Vettingu për anëtarët e KLP-së dhe KLGJ-së, meqenëse puna për ta fillon në shtator. Pas tyre do të verifikohen magjistratët e tjerë. Kërkesa e firmosur nga krye regjistruesi për anëtarët e këtyre organeve është shkruar në datën 30 qershor, ndërsa kërkon të dhëna për pasuritë që kanë krijuar deri në 16 janar 2017-të, kohë kur ka përfunduar edhe afati për dorëzimin e formularit të Vettingut, raporton Klan.
ILDKPKI kërkon informacion për regjistrimin e pronave në emër të tyre dhe pjesëtarëve të familjes, por edhe nëse ka patur shitje apo ndryshime të pronësisë gjatë kohës kur kanë dorëzuar të dhënat. Gjithashtu kërkohen që të gjithë të dhënat të dokumentohen brenda 5 ditëve, në të kundërt do të merren masa të rrepta administrative.
