Tetë punonjës të Hipotekave janë shkarkuar, pas ankesave të qytetarëve për shërbimet në Zyrat e Regjistrimit të Pasurive të Paluajtshme në disa qarqe të vendit.
Lajmin e bëri të ditur ministrja e Drejtësisë, Etilda Gjonaj, e cila tha se pas ankesave në portalin “Shqiperiaqeduam.al”, janë kryer verifikimet nga grupet e inspektimit, të cilat konstatuan probleme në disa Hipoteka të vendit.
“Ministria e Drejtësisë mbetet e angazhuar për të zgjidhur ankesat e qytetarëve. Në muajt e fundit përmes platformës qytetarët kanë shkruar dhe adresuar 207 ankesa. Kam urdhëruar ngritjen e grupeve të inspektimit, që kanë inspektuar Hipotekat në Fier Shkodër, Elbasan dhe Korçë. Janë konstatuar shkelje të ligjit, për 15 ankesa të zgjidhura zvarritjet janë disa vjeçare në shkelje me ligjin. Të vendosur për të goditur shkeljet e ligjit, sot kam marrë masat deri në shkarkim për 8punonjës të ZVRPP për Tiranë, Durrës, Shkodër, Korçë”, tha Gjonaj.
