Drejtoresha Teknike në Autoritetin e Mediave Audiovizive, Elkeda Domi, ka folur për digjitalizimin, ku tha se kalimi i sinjalit nga analog në digjital po bëhet në një situatë të qëndrueshme. Ajo deklaroi në emisionin “Top Show” në Top Channel se nuk ka radhë të gjata në pikat e shitjeve. “Nuk ka radhë të gjata në pikat e shitjeve. Operatorët, shumica kanë reaguar dhe i kanë mbyllur transmetimet dhe jemi në komunikim me operatorët e tjerë”, tha Domi.
Drejtoresha në AMA u shpreh se ky proces duhet të ishte mbyllur që në vitin 2015-të, por është shtyrë vit pas viti.
Sa i përket dekoderave që duhen për sinjalin digjital, Domi tha se sasia e tyre është e mjaftueshme ndaj edhe situata ka qenë nën kontroll.
Dje u mbyll sinjali analog në Tiranë dhe Durrës. Për qarkun e Vlorës, AMA ka vendosur shtyrjen e këtij procesi në një moment tjetër.
