Kombëtarja shqiptare edhe kur nuk luan ka rritje. Këtë e ka vërtetuar FIFA në dy muajt e fundit ku edhe pse kuqezinjtë e drejtuar nga Panucci nuk kanë zhvilluar asnjë ndeshje, kanë fituar 3 pozicione në klasifikim.
FIFA ka publikuar renditjen mujore të skuadrave kombëtare, ku Shqipëria nga vendi i 60-të që ndodhej në muajin janar, janë ngjitur në vendin e 59-të falë rënies me tre pozicione të Algjerisë, duke u vlerësuar me 553 pikë në total.
Ndërkohë, përmirësim +1 ka edhe Kosova, që është ngjitur në vendin 177 me 97 pikë. Sa u takon kundërshtarëve në kompeticionin më të afërt ndërkombëtar, Ligës së Kombeve, Skocia është përmirësuar duke u ngjitur në vendin e 31.
Kujtojmë se kulmin e kulmeve në këtë renditje, Shqipëria e pati në muajin gusht 2015, vendin e 22-të në FIFA. Një rekord historik në ranglistën e kombëtareve të gjithë botës. Sa për histori, vendi i 84-t ka qenë pozicioni më i keq, që ka pasur kombëtarja shqiptare nën drejtimin e Xhani De Biazit. Këtë pozicionim kuqezinjtë e kanë pasur në muajt prill, maj, tetor dhe nëntor 2012.
Në krye të listës nuk ka ndryshime. Gjermania mban kreun, ndjekur nga Brazili dhe Portugalia. Spanja renditet në vendin e 6-të dhe Franca në vendin e 9-të. Italia, pasi mbeti jashtë botërorit në Rusi, vazhdon të jetë jashtë Top 10.
