Sikundër pritej, FIFA ka hapur një hetim disiplinor për Granit Xhakën dhe Xherdan Shaqirin, pasi festuan duke bërë “shqiponjën” në ndeshjen e fituar 2-1 ndaj Zvicrës. Me anë të një deklarate për mediat, bëhet me dije se Komisioni i Disiplinës në FIFA ka hapur një hetim disiplinor, pasi dy futbollistët me origjinë shqiptare, festuan duke bërë “shqiponjën”, në ndeshjen ndaj Serbisë, dhe kjo është mbajtur shënim në relacionin shoqërues të ndeshjes. Tashmë Granit Xhaka dhe Xherdan Shaqiri rrezikojnë të gjobiten, ose në rastin më të keq të pezullohen një ndeshje nga Komisioni i Disiplinës në FIFA, dhe kjo mund t’u kushtojë shtrenjtë vetë futbollistëve por edhe Kombëtares “helvete” në prag të ndeshjes së fundit në grup me Kosta Rikën.
“Komisioni Disiplinor i FIFA-s ka hapur një procedurë disiplinore ndaj lojtarëve të Zvicrës, Granit Xhaka dhe Xherdan Shaqiri, për festimet e tyre të golave kundër Serbisë. Në lidhje me të njëjtën ndeshje, janë hapur edhe procedura disiplinore ndaj Federatës së Serbisë, për shfaqje të mesazheve politike nga ana e tifozëve serb, si dhe për rrëmuja tifozësh. Gjithashtu, një hetim është hapur edhe kundër trajnerit të Serbisë, Mladen Krstajiç për deklaratat e bëra në përfundim të ndeshjes”, thuhet në deklaratën për shtyp.
Federata serbe bëri ankesë në FIFA për mënyrën e festimit të golave të futbollistëve zviceranë, që sipas tyre, përmbante mesazh politik për “Shqipërinë e Madhe”.
Të dy lojtarët janë me prejardhje shqiptare nga Kosova, aty ku spastrimi etnik i ndërmarrë nga serbët ndaj popullsisë shqiptare përfundoi vetëm pas ndërhyrjes ushtarake të NATO-s, në vitin 1999.
Pasi shënuan, ata bënë me duar simbolin e shqiponjës dykrenare të flamurit shqiptar, e sigurisht që të dy u vërshëllyen nga tifozët serbë e rusë.
