FIFA ka rrëzuar kërkesën e Federatës serbe për të pezulluar tre futbollistët e kombëtares zvicerane, dy prej tyre me origjinë shqiptare. Qeveria e futbollit botëror ka marrë vendimin zyrtar për Granit Xhakën, Xherdan Shaqirin dhe mbrojtësin Stephan Lichtsteiner, të cilët festuan me simbolin e shqiponjës golat e shënuar në fitoren kundër Serbisë.
Vendimi i FIFA-s ka qenë në favor të zviceranëve, duke mos pezulluar tre futbollistët, por ndaj tyre do ketë vetëm dënime me gjobë, nga 10 mijë franga për dy shqiptarët, Xhaka dhe Shaqiri, ndërsa Lichtsteiner do paguajë 5 mijë franga zvicerane.
Kujtojmë se Xhaka dhe Shaqiri, futbollistë me origjinë shqiptare, pas golave që përmbysën ndeshjen me Serbinë festuan duke bërë me duar simbolin e shqiponjës.
Ky veprim irritoi pa masë serbët, të cilët jo vetëm që ‘ulëritën’ nëpërmjet mediave të tyre por edhe propaganduan për dënimin e futbollistëve.
Ndërkohë vetë Federata Serbe e Futbollit është gjobitur për për shkak të shfaqjes së flamujve me mesazhe diskriminuese dhe hedhje të objekteve në fushë nga ana e tifozëve. FIFA përveç dënimit 54 mijë franga zvicerane i ka paralajmëruar se në rast përsëritje të këtyre veprimeve atëherë i pret një dënim më i rëndë.
Si përfundim as presidenti i Federatës së Serbisë, Slavisa Kokeza dhe selektori Mladen Krstajic, nuk i kanë shpëtuar dënimit. Për shkak të shkeljes së kodit disiplinor, konkretisht dhënies së deklaratave në kundërshtim me këtë kod, janë dënuar me 5 mijë franga zvicerane si dhe tërheqje të vëmendjes.
Kësisoj, Shaqiri, Xhaka dhe Lichtsteiner do jenë në fushë kundër Costa Ricës, në ndeshjen e tretë dhe të fundit në fazën e grupeve, nga ku Zvicra synon të sigurojë kualifikimin për në 1/8 e Kupës së Botës.
Por ndërkohë që festa e shqiptarëve është cilësuar si provokim, FIFA ka promovuar tre gishtat e famshëm të genocidit në Ballkan që është kthyer në simbol të tyre. Vetëm dy ditë para se të fillonte Botërori, është Matic që pozon për FIFA-n me tre gishte të ngritur lart.
Simboli me 3 gishta lart, përdorej nga ushtarët serb në luftërat dhe gjenocidet që kryenin kundrejt popujve ballkanas dhe tani ka mbetur si një simbol që përkujton masakrat e luftës. E nëse FIFA mendon se shqiponja është provokim, atëherë anëtarët e saj duhet të mësojnë pak më shuam rreth simboleve kombëtare dhe atyre nacionaliste.
