Këto ditë është duke u zhvilluar edicioni i gjashtë i festivalit ndërkombëtar “Jazz in Albania”, dhe pas performancave në kryeqytet, ky festival është shtrirë në Shkodër, Korçë, Pogradec e më gjerë.
Në Korçë, artistët kanë performuar në pazarin e qytetit, me përkrahjen e Bashkisë së këtij qyteti. Artistja austriake Michaela Rabitsch është e emocionuar nga vizita e saj e parë në këtë qytet. “Këtu njerëzit janë shumë të dashur. Ndihem shumë mirë dhe jam shumë e emocionuar që kam ardhur të performojë në këtë qytet. Është qytet i bukur dhe ka kaq shumë njerëz të bukur”, shprehet ajo.
“Është hera e parë që ky festival Jazzi sillet nga organizatorët pikërisht në qytetin e Korçës. Synimi i këtij aktiviteti është që të kombinojë muzikën e veçantë jazz me atraksionet turistike të disa prej qyteteve shqiptare“, shprehet pas festivalit kryebashkiaku i Korçës, Sotiraq Filo.
Të pranishmit kanë kaluar orë të këndshme duke dëgjuar tingujt e duos austriake Rabitsch-Paëlik. Festivali ndërkombëtar Jazz in Albania do të vijojë deri më 26 korrik, duke i shtrirë koncertet sipas programit edhe në disa qytete kryesore të vendit.
