Rikthehet “festa” tek Vllaznia, Këshilli Bashkiak ka miratuar sot buxhetin për ekipin i cili kishte më shumë se tre muaj që nuk merrnin rrogat. Padyshim kjo situatë ka pasur një ndikim të madh në ecurinë e dobët që ka treguar ekipi shkodran në këtë sezon i cili e gjen veten në luftën për mbijetesë. Por këtyre problemeve duket se u erdhi fundi, pasi në mbledhjen e fundit të viti 2017 pati edhe një pikë të rëndësishme të rendit të ditës, e cila ishte miratimi i projektvendimit “Për buxhetin e vitit 2018 dhe planin buxhetor afatmesëm 2018-2020 të Bashkisë Shkodër”.
Shumica e këshilltarëve të pranishëm në sallë kanë ngritur dorën për miratimin e buxhetit. 31 prej tyre kanë qenë dakord, 7 kundër dhe vetëm 1 abstenim. Në këtë mënyrë, nga janari, Vllaznia do të ketë në numrin e saj të llogarisë shumën e mësipërme me të cilën do të paguhen jo vetëm rrogat e prapambetura,do zhvillohet merkatoja, faza përgatitore dhe do të garantohet mbarëvajtja e ecurisë së kampionat.
Miratimi i fondit kaloi me sukses, por ka dhe një pengesë të vogël. Ky fond duhet të marrë miratimin e Prefektit të Shkodrës dhe më pas do të derdhet në thesar. Kjo procedurë kërkon një afat kohor, kështu që futbollistët e Vllaznisë duhet të presin edhe pak kohë për të marrë pagat e prapambetura. Kryetarja e Bashkisë, Voltana Ademi propozoi që për sezonin e ardhshëm kuqeblutë të kenë në dispozicion një buxhet prej 550 milionë lekësh të vjetra.
