29-vjeçari nga Bulqiza, Ferit Keta nuk e ka menduar dy herë sfidën që i ka bërë lugëtari turk Fatih Mehmet Karakus. Ky i fundit prej javësh provokonte duke kërkuar një përballje të dytë me Feritin dhe tashmë dëshira iu plotësua.
Më datë 8 dhjetor në Mynih do të zhvillohet superdueli mes Ketës dhe Karakus. Në lojë janë dy gjerdanët e kampionit të botës në kickbox që zotërohen nga 21-vjeçari turk, ndërkohë që luftëtari kuqezi është kampioni aktual i Europës në kickbox. Kjo do të jetë sfida e dytë mes Ketës dhe Karakus në 3 muaj.
Feriti mposhti rivalin e tij në duelin e zhvilluar në Dibër të Madhe me turkun që u tërhoq në raundin e 4-t, në atë rast ishte një ndeshje boksi që për hir të së vërtetës nuk është disiplina e preferuar e Karakus.
Provokimet e njëpasnjëshme të luftëtarit nga Kirikkale morën tashmë një përgjigje teksa Keta ka nisur përgatitjet në Gjermani nën kujdesin e trajnerit të tij Ismail Ketës. Në këtë rast shprehja që mund ti shkojë përshtat Mehmet Karakusit është : “Kujdes se çfarë dëshiron, sepse dëshira mund të të plotësohet”.
Por një ditë pas publikimit të datës dhe vendit të revanshit të kërkuar nga boksieri turk Mehmet Fatih Karakus, boksieri shqiptar Ferit Keta në një intervistë ka sqaruar: “Sigurisht që nuk mund të rrija pa e pranuar këtë sfidë, pasi sportisti turk Karakus bëri shumë provokime ndaj meje. Unë dua të nderoj egon time sportive dhe të gjithë shqiptarët, data 8 dhjetor do të tregojë gjithçka.”
Paralelisht në atë sfidë do të ndeshet edhe Cheyenne Hanson, boksierja gjermane që tërhoqi vëmendjen e medieve gjermane pas festimit të fitores së saj me shenjën e shqiponjës.
