Ambasadori Amerikan, Donald Lu, në Ditën Ndërkombëtare të Fëmijëve, ka qenë sot në një aktivitet zë zhvilluar nga Bashkia e Tiranës.
Ai ka dhënë një mesazh të fortë për fëmijët e rrugës, ndërsa u shpreh se është gati të mbledhë monedhat e tij për t’i ndihmuar ata, referuar shembullit të fëmijëve të tij, të cilët kanë dhuruar kursimet e tyre të tre viteve për fëmijët e Indisë.
Ambasadori Lu u shpreh se fëmijët në rrugë janë një problem dhe se Shqipëria duhen t’i heqë. “Kur jetoja në Indi me familjen time, aty ishin deri në 11 milion fëmijë në rrugë. Fëmijët e mi bënin biseda të gjata me gruan time dhe me mua për përgjegjësinë tonë personale për t’i ndihmuar ata fëmijë.
Isha krenar për fëmijët e mi, kursyen paratë për 3 vjet dhe i dhanë për një OJF që ndihmonte këta fëmijë për t’i hequr nga rruga.
Fëmijët në rrugë janë një problem që Shqipëria duhet të jetë e aftë ta zgjidhë. Ju nuk keni 11 milion, ju keni vetëm disa qindra fëmijë për t’u kujdesur ndërsa ekonomia zhvillohet e vendi vazhdon t’i afrohet anëtarësimit në BE.
Fëmijët kanë të drejtë të shkojnë në shkollë, të mos jenë të uritur.
Ashtu siç bënë fëmijët e mi, jam gati të mbledh monedhat e mia për të mbështetur UNICEF-in dhe OJFT shqiptare për të ndihmuar fëmijët”.
