Federer “mbret” i finaleve, mes lotësh: Mbyllja e përkryer e një përralle (Video)

Roger Federer edhe pse në moshën 36-vjeçare vazhdon të surpizojë me performancën e tij. Mbreti Roger fitoi një tjetër turne Slam në karrierë duke e nisur me këmbën mbarë vitin 2018 dhe duke u konfirmuar si më i madhi i të gjitha kohërave në tenisin profesionist. Një finale e vuajtur me 5 sete përballë kroatin Marin Cilic, duke fituar për herë të 6-të në karrierë grand-slamin e parë të vitit dhe duke barazuar Novak Djokovic dhe Roy Emerson. Federer ka hipotekuar kështu titullin e 20 të turneve grand-slem, ndërsa në total ai numëron plot 96 triumfe në turne.

Përballë shtatlarit kroat Cilic i cili rezistoi plot 3 orë e 3 minuta në Melbourne, Federer koleksionoi fitoren e 9-të në 10 takime. Federer dominoi në setin e parë, ku fitoi me rezultatin 2-6, ndërsa numri 6 i botës, Cilic u rikthye në setin e dytë, që ishte edhe më i luftuari dhe fitoi 7-6(7-5 në  tiebreak). Seti i 3-të foli sërish për zviceranin, që fitoi 3-6, por Cilic u rikthye edhe një herë të barazojë, duke triumfuar në të 4-tin me të njëjtin rezultat. Në setin final, Federer bëri një lojë perfekte dhe regjistroi rezultatin 6-1, njëkohësisht edh triumfin në këtë turne.

“Ky triumf është mbyllja e përkryer e një përralle, një ëndërr që realizohet. Nuk e prisja këtë triumf këtë vit, pasi një sezoni 2017 të shkëlqyer. Jam shumë i emocionuar, nuk gjej fjalë të përshkruar këtë moment”, u shpreh Federer. “Unë vazhdoj të argëtohem dhe të luaj për fansat. Këtu në Australi kalova një muaj fantastik dhe ju falënderoj të gjithëve për mbështetjen”, u shpreh i emocionuar dhe me lot në sy Federer, ndërkohë që duartrokitjet nuk ndalnin.