Spanja ka arritur të marrë një fitore me shumë vuajtje përballë Iranit, falë një goli të Diego Costas në rrëmujë e sipër. Me këtë fitore spanjollët i bashkohen Portugalisë me 4 pikë në krye të grupit, ndërsa Irani në ndeshjen e tretë do të luaj shanset e kualifikimit përballë Ronaldos me shokë.
Një ndeshje mjaft e bukur, e luftuar nga minuta e parë, me një Iran që me pak më shumë fat mund të kishte dalë me pikë. Ky ishte qëllimi i iranianëve, që të ruanin rrjetën e paprekur pasi vinin me tre pikë nga ndeshja e parë me Marokun, ndërsa Spanjës vetëm fitorja i bënte punë. Pjesa e parë u dominua nga Spanja që kërkonte golin me çdo kusht, por Irani qëndron heroik në mbrojtje dhe shpesh herë vë në vështirësi De Gean.
Spanja e nis me më tepër grintë dhe agresivitet dhe me shumë fat arrin të kalojë në avantazh kur topi përplaset në këmbën e Diego Costa-s dhe përfundon në rrjetë. Irani luan si një trup i vetëm, si në mbrojtje ashtu edhe në sulm.
Dhe madje arrin të krijojë dy-tre raste të mira për të barazuar rezultatin (përfshi një gol të anuluar për pozicion jashtë loje, me VAR). Në fund janë spanjollët që buzëqeshin, por iranianët duhet të ndihen krenarë për disiplinën dhe shpirtin e garës që ka treguar në fushën e lojës.
