Granit Xhaka ishte protagonist absolut për Arsenalin në transfertën e Crystal Palace, e cila ndaloi edhe marshin e fitoreve të ‘Topçinjve’. Arsenal nuk e nisi mirë ndeshjen dhe ishin vendasit ata që krijuan disa mundësi të mira përpara se të kalonin në avantazh në minutën fundit të pjesës së parë. Pas një faulli të Mustafi-t, arbitri Atkinson akordon një penallti e cila shndërrohet në gol nga Milivojevic, i cili tregoi guxim të madh ta godiste megjithëse e humbi një javë më parë.
Ndërsa, në të dytën, Xhaka barazoi dhe Pierre-Emerick Aubameyang, kaloi në epërsi Arsenalin. Megjithatë, ka qenë sërish serbi që ka dyfishuar shifrat me 11-metërsh në minutën e 83’ ku duket se e ka ‘shkaktuar’ Xhaka. Ky barazim nuk e lejoi Arsenalin që t’u ngjiste në vendin e tretë me 23 pikë.
Chelsea nuk e ka ndjerë mungesën e Eden Hazard teksa ka mposhtur Burnley me rezultatin e pastër 4-0 në Turf Mor. Ai që i ka zëvendësuar magjistarin belg ka qenë pikërisht Ross Barkley, i cili me një gol dhe dy asiste ka ndihmuar Blutë drejt fitores së shtatë në Premier League. Tashmë ekipi i Sarri-t ndodhen në vend të dytë të renditjes me vetëm dy pikë më pak se kryesuesit e Liverpool.
Miqtë e gjetën golin e parë në minutën e 22’ falë sulmuesit spanjoll Alvaro Morata. Më në fund ish-lojtari i Real Madrid ka shpërblyer Sarri-n për besimin e treguar. Pas pushimit erdhi dominimi total ndaj një Burnley që nuk tentoi thuajse fare të luftonte për fitoren.
Në minutën e 57’ Barkley shënon një gol që do të konkurrojë me atë të Granit Xhakës për golin e javës. Pesë minuta më pas erdhi goli i nokautit i shënuar nga Willian. Në fund ishte edhe Loftus-Cheek ai shënoi golin e katërt për Chelsea-n. Blutë arritën ta menaxhonin mirë ndeshjen deri në fund duke e mbyllur pa gol të pësuar dhe me tre pikë të tjera në xhep.
