25-vjeçari Indrit Bajraktari ka dalë sot para gjykatës, ndërsa ka folur për herë të parë duke treguar versionin e tij të ngjarjes së rëndë. Indrit Bajraktari u shpreh se së bashku me vajzën ranë nga motori gjatë xhiros në det, dhe nga ai moment nuk mban mend asgjë.
Ai akuzohet për veprat penale ”vrasje nga pakujdesia” dhe “veprime që pengojnë zbulimin e së vërtetës”. Gjykata e shkallës së parë në Shkodër ka vendosur masën e sigurisë “burg pa afat”, për Indrit Bajraktarin i cili akuzohet për vrasje nga pakujdesia të 17-vjeçares Enisa Doda në Velipojë.
Bajraktari ka treguar se me vajzën dhe me familjen e së ndjerës kanë njohje, dhe se familja e Enisës e dinte që do dilte me të.
“Me Enisa Dodaj dhe familjen e saj kam njohje për arsye se ajo ka motrën në Angli. Familja e saj e dinte se do dilte me mua. E mora motorin e ujit dhe isha duke i dhënë unë. Kemi ecur shumë larg nga bregu. Në një moment kam humbur kontrollin ndaj motorit dhe unë kam renë pa ndjenja. Nuk mbaj mend se çfarë ka ndodhur. Pasi jam përmendur kam tentuar të eci me not drejt bregut. Një çift me motor uji më kanë thënë që po njoftojnë këta të pikës së lëshimit me qira të motorëve që të vijnë të më marrin. Ata më nxorën në breg,” është shprehur i riu.
