Milani është duke kaluar një formë mjaft të vështirë në fushën e blertë, por problemet më të mëdha po dalin jashtë saj. Të premten mblidhet komisioni i UEFA-s dhe në mes të dhjetorit, qeveria europiane e futbollit do të dalë me një vendim sa i përket planit financiar të Marco Fassone-s.
Nga ajo çfarë flitet deri më tani, pritet që përgjigja të jetë një “jo” dhe Milani mund të marrë një ndëshkim në bazë të rregullave të “fair play” financiar. I nxitur edhe nga një përgjigje negative e UEFA-s, Presidenti Yonghong Li mund të vendosë që të shesë klubin.
Sipas asaj që raporton “La Repubblica” këtë të hënë duket se interesim ka patur nga një grup arab, që në korridoret financiare njihet si “i nivelit të lartë”.
“La Repubblica” nuk bën me dijë emrin e grupit, por thotë se arabët janë të interesuar për të blerë një paketë të majme aksionesh nga kinezët e Milanit, ose thënë më saktë, duan shumicën e tyre.
