Nga Bled Marku/ Pas 5 vitesh në drejtimin e shqiptarëve të ndershëm e të pandershëm dhe tashmë me timon e tepsi të vetme në dorë, anija kryeministrore duket se po “fundoset” në shkëmbinjtë e Bashkimit Europian ende pa u ankoruar. Motivi është droga e mbjellë në vend, korrupsioni i lartë, drejtësia e pareformuar dhe vonesat që po i bëhen përmbushjes së 5 prioriteteve kyçe të dhëna nga BE.
Skandalet e njëpasnjëshme e kanë tronditur Shqipërinë në 28 vitet e fundit. Të gjithë e mbajmë mend atë çka ndodhi me ish-Kryetarin e Bashkisë Dibër Shukri Xhelili, i cili kërkonte favore seksuale nga një vajzë e re në këmbim të një vendi pune. Ajo që bëri më shumë bujë në atë kohë nuk ishte pjesa që një Kryetar Bashkie ngacmon seksualisht një vajzë, por ishin pamjet e brekëve të tij të grisura të xhiruara nga një kamera e fshehtë.
E risolla këtë histori edhe një herë në vëmendje, jo për të kujtuar Shukriun dhe “shukri-izmat” e tij. Por për të bërë një paralele më ngjarjet e fundit të politikës shqiptare dhe më gjerë.
Të dielën në mbrëmje, Tirana zyrtare priti në një takim Presidentin e Komisionit Europian Jean-Claude Juncker. Përpos “arritjeve të mëdha” të qeverisë Rama, ai lëshoi edhe një mesazh deri diku të pakuptueshëm për vetë kreun e qeverisë duke thënë: “Shumë njerëz më kanë folur për Kryeministrin gjëra jo të mira”. Një mesazh ky aspak i mirëpritur nga Rama që i qendronte në krah.
Ky ishte mesazhi i parë dhe i drejtpërdrejtë që BE i drejton Ramës dhe qeverisë së tij, duke i lënë të kuptojnë se rruga që po ndjek nuk është në shinat e shtruara nga Unioni Europian. Dhe se në Shqipëri ka nevojë për një frymë të re, objektiva të qarta dhe progres më të madh.
Nga ana tjetër, kryeministri Rama edhe pse përpiqet t`i mbulojë me të gjithë forcën aferat korruptive të bëra nga ish-ministrat e qeverisë së tij, ku më skandalozja është ajo e ish-Ministrit të Shëndetësisë Ilir Beqja me koncesionin e Check Up-it, por edhe të ministrave aktual, të cilët janë “enjtur” me përvetësimin e parave publike.
Në kohën e qeverisjes së PD-së nuk u hapën negociatat për anëtarësimin e Shqipërisë në BE. Me argumentin se korrupsioni ishte në shifra alarmante. Dhe në fokus ishin disa ish-Ministra të qeverisë Berisha si më të korruptuarit. Në këtë fushë as qeveria Rama nuk mbetet pas.
Pas 5 vitesh në drejtimin e shqiptarëve të ndershëm e të pandershëm dhe tashmë me timon e tepsi të vetme në dorë, anija kryeministrore duket se po “fundoset” në shkëmbinjtë e Bashkimit Europian ende pa u ankoruar. Motivi është droga e mbjellë në vend, korrupsioni i lartë, drejtësia e pareformuar dhe vonesat që po i bëhen përmbushjes së 5 prioriteteve kyçe të dhëna nga BE.
Dhe jo vetëm kaq. 5 vitet e fundit shqiptarët janë larguar nga vendi duke mbushur dyert e azileve në të gjithë Europën. Ky nuk është një kallëzues i mirë për BE-në, edhe pse nga ana e qeverisë shqiptare po trumpetohet fort se vendi ka një rritje ekonomike të barabartë me atë të Gjermanisë, Suedisë dhe Daminarkës. E nga ana tjetër njerëzit e ndershëm në vend, ata që nuk duan të vjedhin, të grabisin apo të trafikojnë drogë me zor e mbyllin muajin kalendarik.
A e di Europa që Shqipëria është një nga vendet tranzit të drograve të forta e të lehta? A e di Europa që çdo korrupsion në Shqipëri bëhet me “bekimin” e Kryeministrit? A e di Europa që krimi i organizuar shqiptar jo vetëm që e ka marrë ftesën e BE-së, por është integruar plotësisht duke u shkrirë me grupet kriminale më të mëdha në Europë?
BE i di të gjitha. Ka edhe dosje për çdo kriminel që operon qoftë në rrugë apo të veshur me kollare e të mbrojtur nga imuniteti i deputetllëkut.
Nisur nga këto fakte të lartëpërmendura. A është e gatshme BE që të hapë negociatat e anëtarësimit të plotë për një vend si Shqipëria, ku njësoi si ish-Kryetari i Bashkisë së Dibrës, edhe pse në dukje mbante një post të rëndësishëm në një qytet, në fund të fundit u tradhëtua nga brekët e grisura./Pamfleti/
