Rreth 60 mijë shqiptarë kërkuan azil në Gjermani në vitet 2014-2015, prej të cilëve shumë syresh familje me fëmijë në moshë shkolle.
Enti Federal i Imigracionit i ka refuzuar thuajse të gjithë shtetasit shqiptarë, por procedurat zgjasin deri në tre vjet. Nga ana tjetër, fëmijët shkojnë në shkolla dhe thurin ëndrra për të ardhmen, prej të cilave duhet të heqin dorë kur të kthehen në atdhe.
Një ndër shqiptarët që i frikësohen dëbimit, është Evio, teksa familjes së tij iu refuzua azili para dy vitesh.
Ai shkon në shkollë në Berlinin lindor prej dy vitesh, ndërsa ëndërron të bëhet mjek. Por, ai nuk e di nëse do të jetë aty edhe pas një muaji.
Në një vizitë në klasën e tij, në orën e biologjisë të bën përshtypje qetësia dhe komunikimi miqësor me mësuesen. Këtë e tregon edhe vetë Evio. “Nuk bërtasin si në Shqipëri”, thotë ai.
Teksa pyetet si është kthimi në Shqipëri, përgjigja që merr është e dhimbshme: “Shumë keq, as mësuesit as shkollat nuk janë të mira”, thotë ai, duke shtuar se gjithsesi e ka një plan.
“Kur të bëhem 18 vjeç do të vij këtu që të vazhdoj studimet”, thotë Evio për Deutsche Welle.
Videon mund ta shihni këtu: http://www.dw.com/sq/%C3%ABndrra-n%C3%AB-udh%C3%ABkryq-f%C3%ABmij%C3%ABt-e-azilk%C3%ABrkuesve/av-42025900
