Nga të dhënat e fundit të publikuara në Eurostat rezulton se mishi i viçit dhe i lopës zë 45.8% të prodhimit vendas të mishit në Shqipëri. Në vendin të dytë ndjek mishi i derrit, që zë 33.3% të totalit të mishit të prodhuar në vend gjatë 2016-ës.
Shqipëria është një ndër 5 vendet e vetme evropiane ku prodhimi vendas orientohet më së shumti te mishi i lopës dhe i viçit, ndërkohë që në të gjitha vendet e tjera evropiane të marra në analizë, mishi i derrit dhe i gicit është në vend të parë të padiskutueshëm.
Duhet theksuar se prodhimi i mishit të viçit dhe të lopës kërkon një kosto shumë më të lartë se sa prodhimi i mishit të gicit dhe derrit. Ndoshta në vendin tonë ndikon dhe edhe besimi fetar sepse më shumë se gjysma e shqiptarëve i përkasin besimit mysliman dhe ata nuk e konsumojnë mishin e derrit. Ndërkohë thuajse të gjitha shtete e Evropës janë të krishtera. Mishi i viçit kërkon sigurisht më shumë kosto, qoftë në shtim, mirërritje përkujdesje etj. Ndaj shumica e vendeve evropiane konsumojnë mish derri.
Në vend të tretë, në Shqipëri renditet mishi i shpendëve, që zë 12.5% të Prodhimit të Përgjithshëm vjetor në vend. Në vend të katërt dhe të pestë ndërkohë renditet mishi i qengjit dhe i deles si dhe ai i dhisë dhe i kecit me nga 4.1% secili.
Në total, në vendin tonë, janë prodhuar gjithsej 24 mijë tonë mish gjatë 2016-ës thonë të dhënat e fundit të Eurostat.
Në analizë janë marrë gjithsej 35 shtete evropiane. Nga të dhënat rezulton gjithashtu se, vetëm 10 nga këto 35 shtete prodhon mish dhie ose keci, dhe një ndër to është edhe vendi ynë. Sa i përket prodhimit të shpendëve nga industria vendase e mishit, po të bëjmë krahasimin me vendet e tjera të Europës, rezulton se, vendi ynë është ndër përforcuesit më të dobët në këtë drejtim, shkruan Scan.
Në mesataren e Bashkimit Evropian, mishi i shpendëve është i dytë në listë për nga prodhimi, pas atij të derrit, më pas ndjek mishi i lopës dhe i viçit, ai i deles dhe i qengjit e në fund ai i dhive dhe kecit.
