Eurodeputetja e Suedisë me origjinë shqiptare, Arba Kokalari kërkon që Suedia të ndikojë tek vendet e tjera anëtare të Bashkimit Evropian që të votojnë pro hapjes së negociatave për Shqipërinë dhe Maqedoninë e Veriut.
“Këtë javë, ministrat e BE-së do të mblidhen për të vendosur nëse BE duhet të hapë negociatat e anëtarësimit me Shqipërinë dhe Maqedoninë e Veriut. Franca, midis të tjerëve, kundërshton. Suedia duhet të shtyjë ministrat e BE-së që të votojnë pro hapjes së negociatave. Ne duhet të vazhdojmë të shtyjmë qeveritë që të zbatojnë reformat demokratike”, deklaroi Kokalari.
Sipas saj, BE-ja duhet të rrisë kërkesat për demokracinë, por nga ana tjetër duhet edhe të ndihmojë vendet e Ballkanit në mënyrë që ato të ndihmojnë vetveten.
“Me demokraci të lira dhe të qëndrueshme në Ballkan, ne do kemi një Evropë më të lirë dhe të sigurt”, shkruan Arba Kokalari në “Facebook”.
