Brukseli nuk i ka humbur shpresat tek Shqipëria sa i takon përmbushjes së reformave të kërkuara për hapjen e negociatave me BE-në.
Dy muaj para vendimit për negociatat, eurokomisioneri për Zgjerimin Oliver Varhelyi do të zhvillojë sot takime zyrtare në Tiranë.
Zyrtari i lartë i BE-së do të japë porositë e fundit për politikën shqiptare para Samitit të Këshillit Europian, në të cilin vendet anëtarë do të vendosin nëse Shqipëria e meriton apo jo driten jeshile për hapjen e negociatave.
Çështja e negociatave për Ballkanin Përendimor do të sjellë eurokomisionerin për zgjerimi Olivér Várhelyi sot në Tiranë.
Axhenda e takimeve në Tiranë
Gjatë vizitës së tij në kryeqytetin shqiptar, zyrtari i lartë i BE-së do të ketë takime me Presidentin Ilir Meta, Kryeministrin Rama dhe Kryetarin e Kuvendit Gramoz Ruçi.
Gjithashtu eurokomisioneri ka lajmëruar takime edhe me përfaqësuesit e opozitës, por pa caktuar nëse do të jetë ajo parlamentare apo PD bashkë me aleatët e saj.
Ora 10:30 konferencë e përbashkët me kryeministrin Edi Rama.
Ora 12:45 takim me Presidentin Ilir Meta
Ora 15:00 takim me Kryetarin e Kuvendit, Gramoz Ruçi
Ora 16:00 në “Europa House” takim me opozitën
Vizita në Tiranë vjen pas takimeve të eurokomisionerit me përfaqësuesit politikë në Maqedoninë e Veriut.
Në fund të marsit, në mbledhjen e Këshillit Europian pritet të merret vendimi nga shtetet anëtare të unionit në lidhje me negociatat për Tiranën dhe Shkupin.
Varhelyi pas takimeve politike do të vizitojë edhe zonat e prekura nga tërmeti i 26 nëntorit që shkaktoi 51 viktima dhe qindra banesa të shkatërruara.
Ndërkohë që me 17 shkurt Komision Europian do të mbajë në Bruksel edhe Konferencën e Donatorëve, për t’i ardhur në ndihmë Shqipërisë.
