18:00: Turqi – Uells (Grupi A, Baku)
Turqia u shkërmoq nga Italia në Romë të premten, për një pjesë të madhe të ndeshjes e mbyllur në gjysmëfushën e vet, duke u bërë digë për ritmin italian dhe në pamundësi për të gjetur dalje kundërsulmuese – “nuk mund të vazhdonim”, u ankua trajneri Şenol Güneş.
Gjysmëhëna pritet të gëzojë më shumë hapësirë sot dhe të përmirësojë procesin e furnizimit me topa drejt Burak Yılmaz-it, por kundërshtarët e tyre kanë gjithashtu një pykë të frikshme si Kieffer Moore në sulm, heroi i tyre të shtunën, që nëse e nënvlerëson e pëson si Zvicra.
Në ndeshjen e tyre të fundit kundër Turqisë në 1997-ën, Uellsi mori epërsinë dy herë para se të humbte një ndeshje të çmendur 6-4. Sado që tifozët neutralë do të dëshironin të shihnin dhjetë gola përsëri, ndeshja e së orës 18:00 pritet të jetë shumë më e ngushtë si një ndeshje shahu.
Turqisë i bën punë vetëm fitorja ndërsa Uellsin një barazim e mban në lojë për të shpresuar.
Plot dhjetë gola u shënuan herën e fundit që këto dy skuadra u takuan, 24 vjet më parë, Hakan Şükür shënoi katër kur Turqia triumfoi 6-4 në Stamboll!
Formacionet e mundshme:
Turqia: Çakır; Çelik, Demiral, Söyüncü, Meraş; Ayhan, Tufan, Çalhanoğlu, Kahveci, Ünder; Yılmaz
Uellsi: Ward; Roberts, Mepham, Rodon, Davies; Morrell, Allen; Bale, Ramsey, James; Moore
