Associated Press
Shëndeti i udhëheqësit të Koresë së Veriut Kim Jong Un ka qenë prej kohësh një burim i shpresës në Korenë e Jugut, e cila qëndron në hijen e ushtrisë 1.2 milionëshe të Kim Jongut dhe arsenalin e saj në rritje të raketave bërthamore.
A shtoi edhe më shumë peshë? A ka vështirësi në frymëmarrje? Po ky shkop? Pse e humbi aksh ceremoni të rëndësishme shtetërore?
Tani, 37-vjeçari përsëri përballet me spekulime të reja nga jugu lidhur me shëndetin e tij. Por këtë herë, kjo vjen për shkak se ai është dobësuar dukshëm.
Shëndeti i Kim Jongut është i rëndësishëm në Seul, Uashington, Tokio dhe kryeqytete të tjera botërore sepse ai nuk ka projektuar publikisht një pasardhës i cili nëse Kim Jongu është i paaftë fizikisht apo mendërisht, do të kontrollonte një program bërthamor në zhvillim që ka në shënjestër Shtetet e Bashkuara dhe aleatë. Koreja e Veriut, asnjëherë e hapur për punët e brendshme të udhëheqjes së saj, është mbyllur edhe më shumë gjatë vitit të kaluar për të mbrojtur veten nga pandemia e koronavirusit.
Në imazhet e fundit të mediave shtetërore, përfshirë ato të lëshuara të mërkurën, Kim Jongu duket se ka humbur peshë. Rripi i orës së tij elegante është më i ngushtë dhe fytyra më e hollë. Disa vëzhgues pohojnë se Kimi – i cili është rreth 170 centimetra i gjatë dhe më parë peshonte 140 kilogramë- mund të ketë humbur rreth 10-20 kilogramë.
Megjithatë humbja e dukshme e peshës së Kim Jongut është më shumë e mundshme një përpjekje për të përmirësuar shëndetin sesa shenjë e ndonjë sëmundjeje, sipas Hong Min, një analist i vjetër në Institutin Koreane për Bashkimin Kombëtar në Seul.