Shefi i Policisë së Burgjeve është shkarkuar nga detyra, pasi ka dështuar në transferimin e Ervis Martinit nga spitali “Amerikan 2” në Tiranë, tek spitali i Burgjeve. I referohemi ish-drejtorit Enrik Sulejmani, ndërsa bëhet me dije se mjekët e spitalit privat, refuzuan që të firmosnin kartelën dhe fletën e daljes së Martinit. Drejtori i Përgjithshëm i Burgjeve Stefan Çipa ka shkarkuar nga detyra shefin e Policisë së Burgjeve, pasi nuk zbatoi dot urdhrin e transferimit.
Sipas burimeve nga Ministria e Drejtësisë, shefi i Policisë së Burgjeve është shkarkuar mbrëmë. Nga ana tjetër, në këtë histori është përfshirë edhe Policia e Shtetit, që ka marrë një kallëzim nga ana e Burgjeve.
Ervis Martini, një prej të plagosurve në ngjarjen e ish-Bllokut, është transferuar pas shumë tensioneve, në spitalin e burgut. Transferimi në spitalin e burgut është bërë gjatë natës, edhe pas kundërshtimeve të spitalit privat ku ishte shtruar Martini.
Kërkesa ka shkaktuar tension mes mjekëve dhe forcave të rendit. Mjekët e spitalit privat ku po merte mjekimin Martini, kanë kërkuar që ai të vijonte mjekimin në ambientet e tyre spitalore. Ata kanë theksuar se i lënduari ka nevojë për mjekim të specializuar, dhe duhet të qëndrojë ende aty.
Sakaq, gjykata ka vendosur masën 30 ditë burg për Ervis Martinin, i cili mbeti i plagosur mbrëmjen e së enjtes në një lokal në zonën e ish-Bllokut.
