Ermal Meta i njohur si instrumentist, kompozitor, tekstshkrues e këngëtar, tashmë do e shohim edhe si shkrimtar. Një rrugë e re nis për të, ku falë penës ka shkruar një roman, jo autobiografik siç mund ta prisnin adhuruesit e muzikës së tij.
Këngëtari dhe kantautori i njohur shqiptar, Ermal Meta promovoi në Tiranë librin e tij të parë me titull “Nesër e përgjithmonë”.
Në roman ngjarjet shtrihen nga viti 1943 deri në prag të rënies së diktaturës, të cilat rrëfehen në një mori personazhesh dhe ngjarjesh.
Në një roman të jashtëzakonshëm formues, Ermal Meta rrëfen historinë e Kajanit, që rritet mes stuhisë së konflikteve të shekullit XX, një shpirt i ndjeshëm i katapultuar në botë të largëta. Historia zhvillohet në Shqipërinë e Luftës së Dytë Botërore dhe rrëfen përplasjet e jetës njerëzore mes konflikteve të shekullit XX. Romani i vendos ngjarjet në periudhën pas Luftës së Dytë Botërore, në Gjermani, Shtetet e Bashkuara të Amerikës dhe në Shqipërinë komuniste. Personazhet e Ermal Metës “udhëtojnë” nga burgu i Spaçit e deri në Amerikën e largët.
Kajan është protagonisti i romanit i cili sjell luftën personale dhe njerëzore mes ngjarjeve që kapërcejnë dhe vendosin deri diku edhe fatin e personazheve. Por për Metën i cili kthehet në Shqipëri si shkrimtar dhe jo si kauntautor, ngjarjet e asaj kohe ndihmojnë për të kuptuar dhe atë që ndodh sot.
