Vendimi për mbylljen e pikave të bastit nga qeveria shqiptare u përshëndet nga shumë institucione. Së fundmi, është kryetari i Bashkisë së Tiranës, Erion Veliaj që e cilëson këtë vendim si një nga vendimet më fisnike e të guximshme.
Në një postim në Twitter, Veliaj shkruan se ky vendim është në dobi të familjeve shqiptare.
“Qeverisja e @ediramaal i ka sjelle sh te mira ketij vendi e me mire se une per kete do flase historia! Ama ndalimi me ligj i pikave te basteve e kazinove, eshte vendimi me fisnik e i guximshem ne dobi te familjeve shqiptare! Mezi pres Janarin 2019 e @BashkiaTirane pa baste”, shkruan Veliaj në Twitter.
Vendimi për mbylljen e pikave të basteve u bë me dije para dy ditësh nga kreu i Qeverisë, Edi Rama. Ky i fundit, u dha ultimatum edhe mediave për heqjen e reklamave të basteve online.
Kujtojmë se ky është një premtim i hershëm i qeverisë Rama që në tentativën e parë dështoi. Shpresojmë që këtë herë, kryeministri t’i shkojë deri në fund këtij zotimi.
