Nga sot, Erion Braçe është numri dy në qeveri. Lajmin ai e mori nga Rama, teksa kishte marrë fjalën në Asamblenë Kombëtare të PS. Kryeministri Rama, kritikat e Braçes nuk i ka marrë si sulme, por i ka kthyer në batuta dhe e ka bërë protagonist në çdo mbledhje.
Erion Braçe është deputet i Partisë Socialiste, dhe njëherësh kryetar i Komisionit të Ekonomisë. Ai njihet edhe si një nga zërat më kritikë të së majtës, ku çdo pakënaqësi e pasqyronte edhe përmes Instagramit.
Shpesh herë Braçe ka bërë opozitën brenda mazhorancës, duke i thënë hapur kritikat e tij.
Pak javë më parë, në seancë plenare në Kuvend, Braçe u përplas me ish-Ministrin e Ekonomisë, Arben Ahmetaj. Braçe dhe Ahmetaj nuk binin dakord për ligjin për Lojërat e Fatit. Teksa situata ishte e tensionuar, kryeministri ndërhynte me batuta, duke thënë se “Braçe po bën opozitën, në mungesë të kësaj të fundit në Kuvend”.
