“Do të shkoj në Francë dhe ne do të diskutojmë për raportet bilaterale ndërmjet Francës dhe Turqisë”, u tha presidenti i Turqisë, Recep Tayyip Erdogan. Deklarata e presidentit u bë gjatë një fjalimi në televizion.
Erdogan do të udhëtoj për në Francë, më 5 janar për takim me presidentin francez, Emmanuel Macron. Një burim në presidencën e Francës tha se në agjendë të bisedimeve të të dy liderëve, do të jenë, po ashtu, lufta në Siri dhe vendimi nga Shtetet e Bashkuara për njohjen e Jerusalemit si kryeqytet i Izraelit.
Kjo vizitë po bëhet në një periudhë kur janë rritur tensionet në raportet ndërmjet Turqisë dhe Bashkimit Evropian, ndërsa bisedimet për anëtarësimin e Turqisë në BE praktikisht janë ndërprerë, pas kritikave të ashpra të perëndimit në adresë të Ankarasë, për shkak të goditjes turke kundër rivalëve politikë vendës, prej puçit të dështuar të vitit të kaluar, shkruan rel.
Aktualisht, zoti Erdogan tha se shpreson në përmirësim të raporteve me BE-në.
Para tri ditësh ai u tha gazetarëve të Turqisë se “ne duhet ta reduktojmë numrin e armiqve dhe ta shtojmë numrin e miqve”.
