Pas shkarkimi të teknikut italian, Mark Iuliano, ka ardhur edhe operacioni “fshesa” tek lojtarët të cilët ishin afruar në mekaton e verës me kërkesë të ish-teknikut të Partizanit. Bëhet fjalë për Romeo Shahinas, Andrea Selvagio, Eric Herrera dhe Milan Basrak. Lajmin e bëri të ditur vetë klubi kryeqytetas, nëpërmjet një komunikimi ku theksonte se ata nuk do të jenë më pjesë e ekipit, pasi kanë gjetur marrëveshjen me drejtuesit e skuadrës, duke mbyllur përgjatë ditës së sotme me mirëkuptim aventurën me 15 herë kampionët e vendit.
Me 4 ndeshje, 267 minuta në këmbë dhe vetëm një gol të shënuar, në transfertën e Shkodrës, Basrak largohet me një bilanc negativ nga Kategoria Superiore, ku nuk arriti të tregonte pothuajse asgjë nga cilësitë e tij.
21-vjeçari shqiptar, Romeo Shahinas rezultoi gjithashtu një zhgënjim, madje ai bëri më keq se 2 emrat e pare, pasi nuk u aktivizua asnjë minutë në kampionat, por vetëm në Kupë, ku shënoi edhe gol, në sfidën e fituar 7-0 ndaj Naftëtarit në Kuçovë. Gjithashtu vetëm dy herë u grumbullua në ndeshjet e kampionatit, edhe mbrojtësi italian, Andrea Selvaggio, i cili u aktivizua vetëm 90-minuta në ndeshjen e kupës kundër Naftëtarit.
Mesfushori panamez i ardhur nga Paganese, Eric Herrera ishte një tjetër emër që ngjalli shumë kureshtje, por me kalimin e javëve, ai nuk arriti të fitonte besimin e drejtuesve, pasi u aktivizua vetëm 192 minuta dhe numëron plot 6 pankina gjatë 10 javëve të para.
NJOFTIM
Klubi falënderon lojtarët Romeo Shahinas, Andrea Selvagio, Eric Herrera dhe Milan Basrak për kontributin e dhënë me fanellën e Partizanit. Katër lojtarët e afruar përgjatë merkatos së verës kanë gjetur marrëveshjen me drejtuesit e klubit duke mbyllur përgjatë ditës së sotme me mirëkuptim aventurën me 15-të herë kampionët e vendit.
Klubi i uron njëkohësisht lojtarëve të ndihen krenarë që kanë veshur fanellën e kuqe të Partizanit, dhe suksese të mëtejshme në karrierën e tyre sportive.
