Interi po kthehet dalë ngadalë në një koloni kroate, pasi lojtarëve të një sezoni më parë, Perisic, Brozovic, iu bashkua edhe Vrsaljko i ardhur së fundmi nga Atletico Madrid.
Por zikaltrit nuk kërkojnë ta mbyllin me kaq, pasi ëndrra mbetet ylli i Botërorit Rusi 2018, kapiteni i Kroacisë, Luka Modric.
Në Itali shkruajnë se kanë nisur tashmë kontaktet me përfaqësuesit e kroatit, që nuk e ka përjashtuar largimin nga Reali i Madridit, për të nisur një aventurë të re. Rruga për të mbërritur te 32-vjeçari është shumë e vështirë, por Interi kërkon ta provojë, sepse bëhet fjalë për një nënkampion bote me të dhëna të jashtëzakonshme teknikem, shkruan TCH.
Modric, që do të mbushë 33-vjeç më 9 shtator, ka kontratë me Realin deri në vitin 2020. Pasi humbi Cristiano Ronaldon, president i “Los Blancos” vështirë të lejojë largimin e një tjetër xhevahiri. Gjithsesi, Ausilio dhe drejtuesit e tjerë të Interit do të tentojnë të bindin futbollistin, që nuk i ka hedhur asnjëherë poshtë interesimet për të, përkundrazi, është shfaqur i hapur për bisedime.
