Një i ri shqiptar është vrarë një natë më parë në sheshin e lagjes “Exarchia” në Athinë. Bëhet e ditur se viktima është 23-vjeçari shqiptar Mihal Kapurani nga Korça.
Policia bën të ditur se shqiptari është sulmuar nga atentatorët në sheshin e lagjes, pas një konflikti që pati mes tij dhe 3 bashkëkombësve të tij për shkaqe ende të panjohura.
Nga të dhënat thuhet se mes viktimës dhe 3 shqiptarëve të tjerë pati një konflikt dhe debat me tone të larta që më pas degjeneroi në një sherr ku mbeti i varrë 23-vjeçari.
Thuhet se viktima u godit me levë, dhe më pas u sulmua me thikë. Ndonëse u dërgua menjëherë në spital, mjekët nuk mundën ta shpëtonin 23-vjeçarin.
Banorë të zonës thanë se viktima njihej si person pa probleme dhe ishte i punësuar. Autoritetet thanë se kanë identifikuar emrat e ekzekutorëve.
Bëhet fjalë për një shtetas me origjinë nga Përmeti, banor i Athinës, si dhe dy shtetas të tjerë shqiptarë me banim në Shqipëri, të cilët kanë hyrë në kufirin grek pak ditë më parë.
Identitetet e të dyshuarve u janë dërguar pikave kufitare me Shqipërinë, si dhe Policisë shqiptare. Ndërkohë po vijojnë hetimet për zbardhjen e shkaqeve të vrasjes. TIRANA TODAY
