Rreth 24 orë pas kapjes së një furgoni me drogë në Qafë-Thanë zbulohet emri i pronarit. Ashtu siç u tha me burime nga policia, furgoni i përket një firme fasonerie këpucësh me pronar Ilir Dauti.
Bëhet fjalë për firmën “Silda shpk”. 570 kilogramë kanabis ka qenë sasia e drogës së sekuestruar nga policia. Aaksioni u zhvillua në afërsi të pikës së kalimit kufitar të Qafë Thanës gjatë të mërkurës.
E gjithë sasia ishte e fshehur në shasinë e një furgoni mallrash me ngjyrë të bardhë. Ky mjet transporti dyshohej se do të kalonte fillimisht në shtetin fqinj të Maqedonisë nëpërmjet pikës së kalimit kufitare të Qafë-Thanës. Ndërsa destinacioni përfundimtar nuk dihet ende. Mësohet se 8 persona janë ndaluar për ngjarjen.
Mjeti me targë AA 356 NA që po transportonte më shumë se gjysmë tone drogë rezultoi të jetë në pronësi të një biznesi nga Qarku i Fierit.
Hetimi sipas burimeve zyrtare është shtrirë në qarqet e Elbasanit dhe të Fierit. Dyshohet së pjesë e këtij rrjeti është një organizatë kriminale me fuqi të madhe ekonomike. Aktualisht janë identifikuar disa persona të tjerë të përfshirë në trafikun e sasisë prej 570 kg kanabis sativa, disa prej të cilëve dyshohet se janë pjesë e një rrjeti ndërkombëtar të trafikut drogës nga Shqipëria.
