Departamenti amerikan i Drejtësisë ka njoftuar se në pranga ka rënë një ish-zyrtar i Agjencisë Qendrore të Inteligjencës (CIA), ndërsa akuzohet për spiunim për Kinën.
Alexander Yuk Ching Ma, 67-vjeçar, mund të përballet me dënim maksimal nëse dënohet për akuzat se ka kryer komplot me një të afërm, po ashtu zyrtar i CIA-s, për të ofruar informacion të klasifikuar për mbrojtje te zyrtarët kinezë të inteligjencës.
67-vjeçari pritet që të paraqitet sot para gjykatës, ndërsa Prokurori i Havajit, Kenji Price ka thënë se veprimet e të akuzuarit përbëjnë tradhti për SHBA-në.
“Ata që ofrojnë informacione për Republikën Popullore të Kinës, nuk do të shpëtojnë nga krahu i gjatë i ligjit”, ka thënë Price.
Lidhur me akuzat ndaj tij është përmendur një takim tre ditor në Hong Kong, gjatë së cilit, Ma është parë në disa incizime duke përfituar 50.000 dollarë për sekretet që ai dhe i afërmi i tij kanë ofruar.
